喺黃埔九龍海逸君綽酒店有間中菜廳—海雲天，繼早前推出嘅芫荽點心放題後又有新搞作，今次係小編同小朋友都愛嘅「芝士點心放題」呀！！吸引嘅係，單係芝士點心就有10幾款，仲有齊鹹甜點添！Come on～我準備好成口都係芝士啦！！
用餐環境寧靜 真正「嘆茶」
一聽到係「芝士」，屋企嗰兩個小朋友即刻兩眼發光，好興奮咁出門口！海雲天離黃埔站行大概4、5分鐘就到，帶住小朋友去都好方便呢。酒店2樓就係中菜廳，我地揀咗窗邊靚景位，大大塊落地玻璃，望出去係超過180度嘅無敵大海景！欣賞到維港景色之餘間中仲有船慢慢咁行，樓下無大馬路，窗外景色無乜人同車，少咗酒樓食客嘅吵鬧聲，用餐環境好寧靜。
芝士點心外形的式 上枱熱辣辣
講返今次主角先，芝士點心放題一共有15款，用手機Scan QR Code點餐，一於每個款式都order嚟試吓先！每款點心枱熱辣辣，即叫即整，外形的的式式，份量可以每款一個起叫，好食先再Encore，咁就唔會嘥嘢。芝士點心有芝士燒賣、芝士蝦餃、芝士流心奶皇包、芝士伊麵，芝士春卷、芝士蛋撻、韓式芝士年糕同芝士蘿蔔角等等。
除咗芝士伊麵同韓式芝士年糕，其他點心嘅芝士味唔算好出，整體味道都唔錯，食得多都唔會太「漏」。值得一讚嘅係，芝士流心奶皇包有拉絲，口感不錯、韓式芝士年糕中間夾咗芝士餡，加埋韓式辣醬又幾惹味！芝士蛋撻外形迷你，一啖KO！幾似某芝士撻專門店嘅味道，喺呢度就可以任食，就咁每人食一兩件就回哂本啦！
如果食太多芝士想轉吓口味，都可以嗌返其他傳統點心：燒賣、蝦餃、黑金流沙包等，呢個價錢CP值好高呢！
優惠詳情：
90分鐘點心放題【星期一至五: HK$168 ; 星期六、日及公眾假期: HK$188】
設有三個入座時間: 11:00、12:45 及14:30
120分鐘點心放題【星期一至五: HK$218 ; 星期六、日及公眾假期: HK$248】
設有兩個入座時間: 11:00及13:15
供應期：即日至9月30日
小童優惠：凡兩位成人惠顧上述點心放題，同行的一位小童則可享用半價優惠
立即預訂： https://bit.ly/3jQcKJB
